سلمان خان کی فوٹوگرافرز کو پھر تنبیہ، تصاویر لیتے وقت احترام کا مطالبہ

ممبئی( شو بز ڈیسک)بالی ووڈ سپر اسٹار سلمان خان نے ایک بار پھر فوٹوگرافرز کو مشہور شخصیات کی تصاویر لیتے وقت احتیاط اور احترام کا مظاہرہ کرنے کی تنبیہ کردی۔سلمان خان نے گزشتہ روز ’آئیفا 2027‘ کی پریس کانفرنس میں شرکت کی، جہاں انہوں نے فوٹوگرافروں کو تصاویر کے لیے پوز بھی دیے۔ اس موقع پر اداکار نے پاپرازی کو مخاطب کرتے ہوئے کہا کہ ’’پیچھے کا بھی خیال رکھا کریں، اتنی عزت تو آپ سب دے ہی سکتے ہیں۔‘‘اداکار نے اس بات پر زور دیا کہ مشہور شخصیات کی تصاویر بناتے ہوئے ان کی نجی حدود اور احترام کا خیال رکھنا ضروری ہے۔واضح رہے کہ سلمان خان اپنے شو ’بگ باس 20‘ میں بھی اس معاملے پر سخت تشویش کا اظہار کرچکے ہیں۔ انہوں نے کہا تھا کہ بعض فوٹوگرافرز اداکاراؤں کی اجازت کے بغیر ان کی پیچھے سے تصاویر لیتے ہیں، حالانکہ متعلقہ خواتین انہیں ایسا کرنے سے منع بھی کرتی ہیں۔سلمان خان کا کہنا تھا کہ اگر خواتین واضح طور پر منع کریں اور اس کے باوجود ایسا عمل جاری رکھا جائے تو اس معاملے کو سنجیدگی سے دیکھا جائے گا۔میڈیا رپورٹس کے مطابق اداکار نے اس بات پر بھی ناراضی ظاہر کی تھی کہ ان کی سابقہ تنبیہات کو سنجیدگی سے نہیں لیا گیا اور اس کے باوجود یہ رویہ جاری رہا۔