ممبئی( شوبز ڈیسک)بھارت کے نامور کامیڈین سمے رائنا ایک بار پھر خبروں میں آ گئے ہیں، جہاں ان کی واپسی اور نئے کامیڈی پروگرام نے سوشل میڈیا پر ہلچل مچا دی ہے۔رپورٹس کے مطابق ان کے نئے کامیڈی اسپیشل اسٹل الائیو کے اجرا کے بعد شائقین کی جانب سے مثبت ردعمل سامنے آ رہا ہے اور ان کی مقبولیت میں دوبارہ اضافہ دیکھنے میں آ رہا ہے۔سمے رائنا نے یوٹیوب پر اپنے پروگرام کے ذریعے شہرت حاصل کی تھی، تاہم ایک متنازع بیان کے باعث انہیں شدید تنقید اور قانونی مسائل کا سامنا کرنا پڑا تھا، جس کے بعد انہیں اپنے پروگرام اور دیگر مواد ہٹانا پڑا۔عدالتی ریلیف ملنے کے بعد انہوں نے طویل وقفے کے بعد اسٹیج پر واپسی کی اور اپنے نئے پروگرام میں متنازع واقعے کے بعد کی صورتحال پر کھل کر بات کی۔اپنے تازہ پروگرام میں انہوں نے مختلف شخصیات پر طنزیہ انداز اپنایا اور کامیڈی کے ذریعے حالات پر تبصرہ کیا، جس نے انہیں ایک بار پھر توجہ کا مرکز بنا دیا ہے۔
