کراچی( شوبز ڈیسک)پاکستانی اداکارہ ثنا عسکری نے ایک پروگرام میں گفتگو کے دوران اپنی نجی زندگی سے جڑا ایک دلچسپ اور حیران کن واقعہ سنایا جس نے مداحوں کو چونکا دیا۔ثنا عسکری کی شادی اداکار منہاج عسکری سے ہوئی ہے اور دونوں اپنے اپنے شعبوں میں سرگرم ہیں۔ اداکارہ اپنی خوش مزاج طبیعت کے باعث مختلف صبح کے پروگراموں میں شرکت کرتی رہتی ہیں اور اکثر ذاتی زندگی کے دلچسپ قصے بھی شیئر کرتی ہیں۔حال ہی میں وہ اداکار اور میزبان فیصل قریشی کی رمضان نشریات میں بطور مہمان شریک ہوئیں جہاں انہوں نے بتایا کہ ان کے شوہر کو خوفناک کہانیاں بنانے اور سنانے کا خاص شوق ہے۔ اسی مقصد کے لیے انہوں نے گھر میں ایک چھوٹا سا ریکارڈنگ کمرہ بھی بنا رکھا ہے جہاں وہ ڈراؤنی کہانیوں پر مبنی ویڈیوز تیار کرتے ہیں۔ثنا عسکری کے مطابق ان کا بیٹا بھی اب اپنے والد کے اس شوق میں دلچسپی لینے لگا ہے اور کبھی کبھار دونوں مل کر انہیں ڈرانے کی کوشش بھی کرتے ہیں۔اداکارہ نے ایک عجیب واقعہ بیان کرتے ہوئے کہا کہ چند ماہ پہلے انہیں یوں محسوس ہوا جیسے گھر میں کسی نے انہیں ان کے شوہر کی آواز میں پکارا ہو، حالانکہ اس وقت وہ گھر میں موجود نہیں تھے۔ ثنا عسکری کے مطابق اس واقعے کے بعد انہوں نے اپنے شوہر سے کہا کہ خوفناک کہانیاں بنانے کا سلسلہ کچھ کم کر دیں۔
