کراچی( شوبز ڈیسک) پاکستان شوبز سے تعلق رکھنے والی معروف جوڑی علی انصاری اور صبور علی نے اپنی بیٹی سرینا کی پہلی سالگرہ نہایت سادگی سے منائی، جس کی دلکش تصاویر منظر عام پر آتے ہی تیزی سے مقبول ہو گئیں۔صبور علی نے اس یادگار موقع کی تصاویر اپنے سماجی رابطے کے پلیٹ فارم پر شیئر کیں، جن میں خاندان کے افراد کو خوشگوار ماحول میں دیکھا جا سکتا ہے جبکہ ننھی سرینا کھلونوں کے ساتھ کھیلتی ہوئی نظر آئی۔ تقریب میں شوبز سے وابستہ کئی معروف شخصیات نے بھی شرکت کی۔تقریب میں اداکارہ سجل علی کی موجودگی نے بھی مداحوں کی خصوصی توجہ حاصل کی۔صبور علی نے اپنی تحریر میں بتایا کہ انہوں نے یہ تصاویر کچھ تاخیر سے شیئر کیں کیونکہ وہ اس خوبصورت لمحے کو اپنے دل تک محدود رکھنے یا دوسروں کے ساتھ بانٹنے کے بارے میں سوچ بچار کر رہی تھیں، تاہم بعض جذبات ایسے ہوتے ہیں جنہیں بیان کیے بغیر رہا نہیں جاتا۔انہوں نے اپنی بیٹی سے بے پناہ محبت کا اظہار کرتے ہوئے لکھا کہ اس کے ننھے سے رونے کو سمجھنے سے لے کر اس کی خاموش ضرورتوں کو محسوس کرنے تک اور جاگتی راتوں سے لے کر اس کی آغوش کی گرمی تک ہر لمحہ ایک حسین تجربہ رہا ہے۔صبور علی کا کہنا تھا کہ وہ آج بھی اس بات پر حیران ہیں کہ ایک ننھی سی جان کیسے ان کی پوری دنیا بن گئی، انہوں نے اپنی بیٹی کے ساتھ ہمیشہ حفاظت، رہنمائی اور ہر حال میں ساتھ دینے کا عہد بھی کیا۔واضح رہے کہ صبور علی اور علی انصاری کی شادی 2022 میں ہوئی تھی اور یہ جوڑی مداحوں میں خاصی مقبول ہے۔
