لاہور( شوبز ڈیسک)پنجاب حکومت نے کیپٹن (ر) شاہ میر اقبال کو پنجاب فلم سٹی اتھارٹی کے چیف ایگزیکٹو افسر کا اضافی چارج دے دیا ہے، جس کا باقاعدہ نوٹیفکیشن بھی جاری کر دیا گیا ہے۔جاری کردہ نوٹیفکیشن کے مطابق آئی ڈیپ کے چیف ایگزیکٹو افسر کیپٹن (ر) شاہ میر اقبال مستقل تقرری تک پنجاب فلم سٹی اتھارٹی کے امور بھی سنبھالیں گے۔نئی ذمہ داری کے تحت وہ بیک وقت دونوں اداروں کی انتظامی، ترقیاتی اور منصوبہ بندی سے متعلق سرگرمیوں کی نگرانی کریں گے اور جاری منصوبوں کی پیش رفت کا جائزہ لیں گے۔حکومتی ذرائع کے مطابق یہ اضافی ذمہ داری انہیں مؤثر انتظامی صلاحیتوں اور مختلف منصوبوں کی بروقت تکمیل کے اعتراف میں سونپی گئی ہے۔ ان کی قیادت میں نواز شریف کینسر کیئر ہسپتال کے اہم حصے کو ریکارڈ مدت میں مکمل کیا گیا، جسے ان کی کارکردگی کا نمایاں سنگِ میل قرار دیا جا رہا ہے۔حکام کا کہنا ہے کہ اس تقرری سے پنجاب فلم سٹی اتھارٹی کے ترقیاتی اور انتظامی امور کو مزید مؤثر انداز میں آگے بڑھانے میں مدد ملے گی۔
