ممبئی( شو بز ڈیسک)بالی ووڈ کے معروف فلمساز سنجے گپتا نے 1990ء کی دہائی میں بھارتی فلم انڈسٹری پر انڈر ورلڈ کے اثرات کا ذکر کرتے ہوئے سپر اسٹار شاہ رخ خان کے حوالے سے اہم انکشاف کیا ہے۔ایک حالیہ انٹرویو میں سنجے گپتا نے ماضی کا ذکر کرتے ہوئے کہا کہ وہ اس دور کے براہِ راست گواہ ہیں جب ممبئی میں انڈر ورلڈ کا خوف اپنے عروج پر تھا اور فلمی اداکاروں، ہدایت کاروں سمیت شوبز سے وابستہ کوئی بھی شخص اس کے اثر و رسوخ سے محفوظ نہیں تھا۔فلمساز کے مطابق اس زمانے میں معروف اداکاروں اور اداکاراؤں کو مخصوص فلموں میں کام کرنے پر مجبور کرنے کے لیے دباؤ ڈالا جاتا تھا، جبکہ انڈر ورلڈ سے وابستہ افراد فلموں کے سیٹس پر پہنچ کر شوٹنگ بھی دیکھا کرتے تھے۔ ان حالات میں شاہ رخ خان ان شخصیات میں شامل تھے جنہوں نے دباؤ قبول کرنے سے انکار کردیا۔سنجے گپتا کے مطابق شاہ رخ خان کو دھمکیاں دی گئیں اور فلموں یا شوز میں کام کرنے کے لیے دباؤ ڈالا گیا تو اداکار نے واضح طور پر انکار کرتے ہوئے کہا کہ وہ ان کے لیے نہ فلم بنائیں گے اور نہ ہی کسی شو میں کام کریں گے۔فلمساز نے شاہ رخ خان سے منسوب ردعمل بیان کرتے ہوئے کہا کہ اداکار نے مبینہ طور پر جواب دیا، ’میں پٹھان ہوں، گولی مارنی ہے تو مار دو، میں تم سے نہیں ڈرتا۔‘
