راولپنڈی (سپورٹس ڈیسک) پاکستان کرکٹ ٹیم کے سابق کپتان شاہد آفریدی نے قومی ٹی ٹوئنٹی ٹیم کے کپتان صاحبزادہ فرحان کو ایک روزہ بین الاقوامی کرکٹ ٹیم میں موقع دینے کا مطالبہ کیا ہے۔انگلینڈ کے خلاف راولپنڈی میں سہ ملکی ایک روزہ سیریز کے دوسرے میچ میں پاکستان کی 87 رنز سے شاندار کامیابی کے بعد شاہد آفریدی نے قومی ٹیم کے نوجوان کھلاڑیوں کی کارکردگی کو سراہا۔سابق کپتان نے بالخصوص عرفات منہاس اور حسن نواز کی کارکردگی کی تعریف کی اور سماجی رابطے کی ویب سائٹ ایکس پر اپنے پیغام میں صاحبزادہ فرحان کو بھی قومی ون ڈے ٹیم میں شامل کرنے کی تجویز پیش کی۔دوسری جانب پاکستان کے سابق کپتان محمد یوسف نے بھی نوجوان کھلاڑیوں کی کارکردگی کو سراہتے ہوئے عرفات منہاس، حسن نواز اور سعد بیگ کی صلاحیتوں کی تعریف کی۔محمد یوسف کا کہنا تھا کہ سمیر منہاس، رضا اللہ، معاذ صداقت، عاکف جاوید اور علی رضا جیسے نوجوان کھلاڑی بھی مستقبل میں بڑے اسٹارز بننے کی صلاحیت رکھتے ہیں۔ان کے مطابق ان کھلاڑیوں کی کارکردگی اور صلاحیتیں پاکستانی کرکٹ کے مستقبل کے لیے امید افزا ہیں۔ نوجوان کھلاڑیوں کو مناسب مواقع اور رہنمائی فراہم کی جائے تو وہ مستقبل میں قومی ٹیم کے لیے اہم کردار ادا کرسکتے ہیں۔
