کراچی( شو بز ڈیسک) پاکستانی ڈرامہ سیریل ’’محبت‘‘ کی پہلی قسط نشر ہوتے ہی نئے اداکار شاہویر کادوانی کی اداکاری سوشل میڈیا پر بحث کا موضوع بن گئی۔ڈرامے میں شاہویر نے زرار کا کردار نبھایا ہے۔ پہلی ہی قسط کے ایک یونیورسٹی منظر میں وہ ایک سینئر کی جانب سے اپنے دوست سے بدتمیزی کیے جانے پر روایتی غصے والے ہیرو کے انداز میں اسے سبق سکھاتے دکھائی دیتے ہیں۔یہ منظر سماجی رابطوں کی ویب سائٹس پر وائرل ہونے کے بعد متعدد صارفین نے شاہویر کی اداکاری پر تنقید کی اور انہیں ’’پرچی‘‘ اور ’’حوالہ استعمال کرنے والا اداکار‘‘ جیسے القابات دیے۔بعض صارفین نے ان کی ڈرامے میں شمولیت پر بھی سوالات اٹھائے اور ان کی کاسٹنگ کو ان کے والد اور ڈرامے کے پروڈیوسر عبداللہ کادوانی سے منسلک کیا۔
