نیو یارک( شوبز ڈیسک)ہالی ووڈ اداکارہ شیلین ووڈلی نے انکشاف کیا ہے کہ انہوں نے 2014 میں ریلیز ہونے والی فلم ’’دی امیزنگ اسپائیڈر مین 2‘‘ میں میری جین واٹسن کا کردار ادا کیا تھا، تاہم فلم کی نمائش سے قبل ان کے تمام مناظر نکال دیے گئے۔ایک حالیہ گفتگو میں اداکارہ نے بتایا کہ اسپائیڈر مین ان کا پسندیدہ سپر ہیرو اور میری جین بچپن سے پسندیدہ کردار تھا، اس لیے فلم میں یہ کردار ملنے پر وہ بہت خوش ہوئی تھیں۔شیلین ووڈلی کے مطابق انہوں نے اینڈریو گارفیلڈ کے ساتھ تقریباً تین مناظر عکس بند کرائے، تاہم تقریباً ایک سال بعد انہیں فون پر اطلاع دی گئی کہ وہ اب فلم کا حصہ نہیں رہیں گی۔اداکارہ نے بتایا کہ انہیں وضاحت دی گئی تھی کہ فلم میں پہلے ہی متعدد نئے کردار شامل کیے جارہے ہیں، اس لیے فلم ساز ایما اسٹون کے گوین اسٹیسی اور اینڈریو گارفیلڈ کے پیٹر پارکر کی کہانی کو مکمل کرنا چاہتے تھے۔ منصوبہ تھا کہ میری جین کو آئندہ فلم میں متعارف کرایا جائے گا۔تاہم اینڈریو گارفیلڈ کی ’’دی امیزنگ اسپائیڈر مین‘‘ سیریز کی تیسری فلم نہ بن سکی، جس کے باعث شیلین ووڈلی کو میری جین کے کردار میں دوبارہ پیش کرنے کا منصوبہ بھی ختم ہوگیا۔اس واقعے کو یاد کرتے ہوئے اداکارہ نے مزاحیہ انداز میں کہا کہ ممکن ہے اصل وجہ کچھ اور ہو اور شاید ان کی اداکاری ہی اتنی خراب رہی ہو کہ فلم سازوں نے انہیں فلم سے نکالنے کا فیصلہ کیا ہو۔
