کراچی( شوبز ڈیسک)پاکستانی گلوکارہ شائے گل نے ہانیہ عامر کے نئے گانے ’پابلو‘ اور اپنے گیت ’اِن سیکیورٹی‘ میں مماثلت کے حوالے سے سوشل میڈیا پر جاری بحث پر وضاحت کردی۔ہانیہ عامر کا گانا سامنے آنے کے بعد صارفین نے دونوں گیتوں کا موازنہ شروع کیا، جبکہ بعض افراد نے شائے گل کے کام سے مماثلت پر ہانیہ عامر کو تنقید کا نشانہ بھی بنایا۔یہ معاملہ اس وقت مزید زیرِ بحث آگیا جب شائے گل نے اپنے گانے ’اِن سیکیورٹی‘ کی پہلی سالگرہ کے موقع پر اس کا صوتی انداز میں نیا ورژن جاری کیا۔ پوسٹ کے وقت کو دیکھتے ہوئے کچھ مداحوں نے اسے ہانیہ عامر کیلئے بالواسطہ پیغام قرار دیا۔شائے گل نے ان قیاس آرائیوں کی تردید کرتے ہوئے کہا کہ ان کا مقصد کسی پر طنز کرنا نہیں تھا اور وہ کسی سے نفرت نہیں کرتیں۔ انہوں نے واضح کیا کہ گزشتہ ستمبر میں ان کا پہلا انفرادی گانا جاری ہوا تھا، اس لیے رواں ستمبر میں صوتی ورژن پیش کرکے صرف اس کی پہلی سالگرہ منائی۔گلوکارہ نے کہا کہ گانے کی سالگرہ منانے کو کسی کیلئے طنز کیسے سمجھا جاسکتا ہے۔ ان کا کہنا تھا کہ وہ ہر تبصرے کا جواب دے کر اپنی وضاحت پیش نہیں کرسکتیں، مداح اپنی مرضی سے جو سمجھنا چاہیں سمجھ سکتے ہیں۔شائے گل کے نئے صوتی ورژن کو آئمہ بیگ، عبدالحنان، انورال خالد سمیت متعدد فنکاروں اور سماجی ذرائع ابلاغ سے وابستہ شخصیات نے بھی سراہا۔
