شازیہ منظور کا چاہت فتح علی خان سے متعلق مزاحیہ تبصرہ، ٹی وی شو میں قہقہے بکھر گئے

لاہور( شوبز ڈیسک)پاکستان کی معروف لوک اور پلے بیک گلوکارہ شازیہ منظور نے ایک ٹی وی پروگرام میں سوشل میڈیا کی معروف شخصیت چاہت فتح علی خان سے متعلق ایسا دلچسپ اور مزاحیہ تبصرہ کیا کہ اسٹوڈیو میں موجود حاضرین بے اختیار ہنس پڑے۔پروگرام کے دوران ایک سوال پوچھا گیا کہ اگر انہیں چاہت فتح علی خان کے ساتھ ڈوئیٹ گانے کی پیشکش ہو تو وہ کیا کریں گی؟ اس پر شازیہ منظور مسکرا دیں اور مزاحیہ انداز میں جواب دیتے ہوئے کہا کہ وہ اس سوال پر خود بھی حیران ہیں اور انہیں سمجھ نہیں آ رہا کہ کیا جواب دیا جائے۔انہوں نے ہنستے ہوئے کہا کہ انہیں معاف کر دیا جائے، اور مزید مزاحیہ انداز میں یہ بھی کہا کہ شاید چاہت فتح علی خان کو ہی سب کو معاف کر دینا چاہیے۔اس دلچسپ جواب پر نہ صرف حاضرین بلکہ میزبان بھی ہنس پڑے اور یہ لمحہ پروگرام کی خاص جھلکیوں میں شامل ہو گیا۔گفتگو کے دوران جب میزبان نے پوچھا کہ کیا وہ کبھی چاہت فتح علی خان سے ملی ہیں تو انہوں نے فوراً کہا کہ “اللہ معاف کرے” اور واضح کیا کہ ان کی کبھی ملاقات نہیں ہوئی۔ تاہم انہوں نے بتایا کہ وہ سوشل میڈیا پر ان کی ویڈیوز دیکھتی ہیں اور اکثر ان پر تبصرہ بھی کرتی ہیں۔یہ کلپ سوشل میڈیا پر تیزی سے وائرل ہو رہا ہے اور صارفین شازیہ منظور کے برجستہ اور مزاح سے بھرپور ردعمل کو خوب سراہ رہے ہیں۔