ممبئی( شو بز ڈیسک)بھارتی اداکارہ اور ماڈل شہناز گل نے پاکستانی ڈرامہ انڈسٹری اور اس کے فنکاروں کی تعریف کرتے ہوئے کہا ہے کہ پاکستانی ڈرامے رومانوی کہانیوں کی پیشکش میں منفرد مقام رکھتے ہیں۔ایک حالیہ انٹرویو میں شہناز گل نے کہا کہ پاکستانی ڈراموں میں رشتوں اور محبت کو نہایت خوبصورتی اور حقیقت سے قریب انداز میں پیش کیا جاتا ہے، جو ناظرین کو اپنی جانب متوجہ کرتا ہے۔ان کا کہنا تھا کہ پاکستانی ڈراموں میں محبت کے اظہار کے لیے غیر ضروری جسمانی قربت پر انحصار نہیں کیا جاتا، بلکہ جذبات، تاثرات اور مضبوط اداکاری کے ذریعے کہانی کو مؤثر انداز میں آگے بڑھایا جاتا ہے، جس سے کرداروں کے درمیان رومانس زیادہ فطری محسوس ہوتا ہے۔شہناز گل نے پاکستانی ڈراموں کو رومانوی کہانیوں کے حوالے سے بے مثال قرار دیتے ہوئے اپنے پسندیدہ ڈراموں میں "میری زندگی ہے تو" اور "کبھی میں کبھی تم" کا بھی ذکر کیا۔
