ایران میں گلوکارہ پرستو احمدی سمیت 9 افراد کو کوڑوں اور ملک بدری کی سزا

 تہران( شوبز ڈیسک)ایران کی ایک عدالت نے معروف گلوکارہ پرستو احمدی اور “کاروان سرائے” کنسرٹ کے مزید آٹھ ارکان کو 74 کوڑوں کی سزا سنائی ہے۔برطانوی نشریاتی ادارے کے مطابق عدالت نے ان تمام افراد پر دو سال کے لیے ملک چھوڑنے اور فن سے متعلق سرگرمیوں میں حصہ لینے پر بھی پابندی عائد کر دی ہے۔یہ فیصلہ ایران کے صوبہ قم کی ایک عدالت نے اسلامی قانون کی دفعات کے تحت سنایا، جس میں ہر رکن کو یکساں سزا دی گئی۔ عدالت نے یہ بھی حکم دیا ہے کہ اس فیصلے کو قومی میڈیا میں شائع کیا جائے۔عدالتی فیصلے کے مطابق سزا پانے والوں پر الزام ہے کہ انہوں نے انٹرنیٹ پر غیر اخلاقی اور نامناسب مواد شیئر کیا، جس سے عوامی حیا متاثر ہوئی۔رپورٹس کے مطابق گلوکارہ پرستو احمدی کے یوٹیوب چینل پر اپ لوڈ کی گئی “کاروان سرائے” کنسرٹ کی ویڈیو میں انہیں بغیر حجاب کے گاتے ہوئے دکھایا گیا تھا۔یہ ویڈیو چند گھنٹوں میں ایک لاکھ سے زائد بار دیکھی گئی جبکہ بعد میں سوشل میڈیا پر تیزی سے وائرل ہو گئی اور اب تک اسے لاکھوں بار دیکھا جا چکا ہے۔