کراچی ( شو بز ڈیسک)پاکستانی فیشن ڈیزائنر پریشے عدنان نے نیویارک فیشن ویک میں پاکستان کی نمائندگی کے بعد ایک ٹی وی انٹرویو میں پوچھے گئے سوالات پر ناراضی کا اظہار کیا ہے۔حال ہی میں نادیہ خان نے عامر عدنان برانڈ کی چیف ایگزیکٹو پریشے عدنان کا انٹرویو کیا، جس میں کام سے متعلق سوالات کے بجائے ان سے ذاتی نوعیت کے سوالات بھی کیے گئے۔ہوسٹ نادیہ خان نے پریشے عدنان سے پوچھا کہ کیا ان کے والدین ان کے جم کلیکشن کے نسبتاً بولڈ ڈیزائنز پر رضامند ہیں، جس پر پریشے نے کہا کہ انہیں ہمیشہ اپنے والدین کی مکمل حمایت حاصل رہی ہے۔پریشے عدنان کے مطابق عالمی سطح پر اپنے کام اور پاکستانی ثقافت کی نمائندگی کرنے کے بعد وطن واپسی پر ان سے جم کے کپڑوں اور سوشل میڈیا پر فٹنس ویڈیوز سے متعلق سوالات کیے گئے، جنہیں انہوں نے نامناسب قرار دیا۔ان کے مؤقف کو سوشل میڈیا صارفین کی جانب سے حمایت ملی، جبکہ اداکار یاسر حسین نے بھی انٹرویو میں موضوعات کے انتخاب پر تنقید کی۔
