کیلیفورنیا( ویب ڈیسک)ایک نئی تحقیق میں انکشاف ہوا ہے کہ تدریسی امور کے لیے آرٹی فیشل انٹیلی جنس (اے آئی) چیٹ بوٹس استعمال نہ کرنے والے طلبہ کی کارکردگی ان کے استعمال کرنے والے طالبعلموں سے بہتر رہتی ہے۔انجمن اقتصادی تعاون و ترقی (او ای سی ڈی) کی تعلیم سے متعلق رپورٹ میں اے آئی ٹیکنالوجی کے بچوں کی سیکھنے کی صلاحیت پر اثرات کا جائزہ لیا گیا ہے۔رپورٹ میں اے آئی سے گریز کرنے والے طلبہ کے سائنس ٹیسٹ کے نتائج کا موازنہ چیٹ بوٹس استعمال کرنے والے 484 طالبعلموں کی کارکردگی سے کیا گیا۔ نتائج کے مطابق اے آئی استعمال نہ کرنے والے طلبہ کا اوسط اسکور 509 رہا، جبکہ چیٹ بوٹس استعمال کرنے والے طالبعلموں نے اوسطاً 481 پوائنٹس حاصل کیے۔تحقیق کے مطابق دونوں گروہوں کے درمیان 28 پوائنٹس کا فرق ڈیڑھ سال کے دوران مسلسل برقرار رہا۔ اے آئی کے دیگر استعمال، مثلاً نئے موضوع پر تحقیق اور مطالعے کے بعد خلاصہ تیار کرنے میں بھی اسی نوعیت کے نتائج سامنے آئے۔محققین کا کہنا ہے کہ سیکھنے کے لیے صرف معلومات یاد کرنا کافی نہیں بلکہ ذہنی محنت اور غوروفکر نئے مواد کو سمجھنے میں اہم کردار ادا کرتے ہیں۔ان کے مطابق اے آئی ٹیکنالوجی کو مستقل بیساکھی بنانے کے بجائے عارضی معاون کے طور پر استعمال کرنا چاہیے تاکہ دماغی صلاحیتوں کو فائدہ پہنچے اور تعلیمی میدان میں بہتری آئے۔ اے آئی پر حد سے زیادہ انحصار مسائل کا باعث بن سکتا ہے۔محققین اس سے قبل 2022 میں بھی ایسی تحقیق کر چکے ہیں، اس وقت اے آئی ٹیکنالوجی تیزی سے مقبول ہونا شروع ہوئی تھی۔
