ممبئی( شو بز ڈیسک)ہالی ووڈ اداکارہ سڈنی سوینی کی امریکی کھیلوں کی پیش گوئی کرنے والے پلیٹ فارم نووگ کیلئے نئی تشہیری مہم نے خواتین کے کھیلوں کی نمائندگی پر بحث چھیڑ دی۔مہم میں سڈنی سوینی کو نیم عریاں لباس میں باسکٹ بال، فٹ بال اور دیگر کھیلوں کے سامان کے ساتھ مختلف انداز میں دکھایا گیا ہے۔ اشتہارات پر عام صارفین کے علاوہ متعدد پیشہ ور خواتین کھلاڑیوں نے بھی اعتراض کیا۔چار مرتبہ کی اولمپک طلائی تمغہ جیتنے والی آرین ٹٹمس نے مہم پر ناراضی کا اظہار کرتے ہوئے کہا کہ کھیلوں میں برسوں محنت کرنے والی خواتین کی صلاحیت، تربیت اور کامیابی کے بجائے ان کے جسم کو تشہیر کیلئے استعمال کرنا مناسب نہیں۔برطانوی دوڑنے والی ایمی ہنٹ نے بھی مہم کو تنقید کا نشانہ بناتے ہوئے کہا کہ خواتین کے کھیلوں کی حقیقت میں سخت تربیت، پسینہ، مقابلہ اور برسوں کی جدوجہد شامل ہے۔ تیراک لینی پیلسٹر اور دوڑنے والی بری ریزو نے بھی اپنی تربیت اور مقابلوں کی ویڈیوز شیئر کرکے کھیلوں میں خواتین کی مختلف تصویر پیش کی۔اولمپک چاندی کا تمغہ جیتنے والی واٹر پولو کھلاڑی ٹلی کیئرنز اور عالمی چیمپئن باکسر اسکائی نکلسن سمیت دیگر کھلاڑیوں نے بھی تشہیری مہم کے تصور پر سوالات اٹھائے۔ اسکائی نکلسن نے خوبصورتی کے اظہار اور جنسی کشش کو اشتہاری حربے کے طور پر استعمال کرنے میں فرق واضح کیا۔تنقید کا اصل مرکز سڈنی سوینی کا بولڈ انداز نہیں بلکہ یہ سوال ہے کہ خواتین کے کھیلوں کو ان کی محنت اور کامیابی کے بجائے جنسی انداز میں کیوں پیش کیا جارہا ہے۔
