ٹی 20 ورلڈ کپ 2026: پاکستان کے سیمی فائنل کے امکانات نازک، سری لنکا میچ کل فیصلہ کرے گا

لاہور( سپورٹس ڈیسک)ٹی 20 ورلڈ کپ 2026 میں پاکستان کے سیمی فائنل تک رسائی کے امکانات انتہائی کم ہو گئے ہیں، مگر مکمل طور پر ختم نہیں ہوئے۔ سپر 8 مرحلے میں انگلینڈ کے ہاتھوں شکست کے بعد پاکستان کو اپنے آخری میچ میں فتح حاصل کرنا ہوگی اور دیگر میچوں کے نتائج بھی پاکستان کے حق میں جانے چاہئیں۔پاکستان 28 فروری کو سپر 8 کے آخری میچ میں سری لنکا کے خلاف میدان میں اترے گا۔ اس وقت پاکستان کے پاس صرف ایک پوائنٹ ہے، جبکہ انگلینڈ نے پہلے ہی سیمی فائنل کے لیے کوالیفائی کر لیا ہے۔پاکستان کو سیمی فائنل میں پہنچنے کے لیے سری لنکا کو شکست دینا ضروری ہے تاکہ تین پوائنٹس مکمل ہوں، تاہم صرف جیت کافی نہیں، کیونکہ نیوزی لینڈ کے بقیہ میچز کے نتائج بھی پاکستان کے لیے اہم ہوں گے۔ اگر نیوزی لینڈ دونوں بقیہ میچ ہار دیتا ہے تو پاکستان دوسرے نمبر پر سیمی فائنل میں جگہ بنا سکتا ہے۔اگر پاکستان جیت جاتا ہے لیکن نیوزی لینڈ ایک میچ جیت لیتا ہے تو دونوں ٹیمیں تین تین پوائنٹس پر پہنچیں گی، اور سیمی فائنل کی جگہ نیٹ رن ریٹ کے حساب سے طے ہوگی۔ دوسری طرف، اگر پاکستان سری لنکا سے ہار جاتا ہے یا میچ ملتوی ہو جاتا ہے تو وہ سیمی فائنل کی دوڑ سے باہر ہو جائے گا۔ماہرین کے مطابق سپر 8 کے دیگر گروپ میں انگلینڈ پہلے ہی سیمی فائنل کے لیے کوالیفائی کر چکا ہے، اس لیے پاکستان کے امکانات اب اپنے آخری میچ اور نیٹ رن ریٹ پر منحصر ہیں۔