کراچی (سپورٹس ڈیسک) پاکستانی اسکول کرکٹ میں سنچری بنانے والے نوعمر وکٹ کیپر بلے باز ایڈم گلکرسٹ توجہ کا مرکز بن گئے ہیں۔ ان کی شاندار کارکردگی کے بعد وہ بین الاقوامی ذرائع ابلاغ کی خبروں میں بھی جگہ بنانے میں کامیاب ہوگئے ہیں۔سابق آسٹریلوی مایہ ناز کرکٹر ایڈم گلکرسٹ کی طرح بائیں ہاتھ سے کھیلنے والے اس نوجوان وکٹ کیپر بلے باز کی کارکردگی سماجی رابطوں کی ویب سائٹس پر بھی مقبول ہو رہی ہے۔ایڈم گلکرسٹ نے پاکستان کرکٹ بورڈ کے اسکول کرکٹ ٹیلنٹ ہنٹ پروگرام کے تحت انڈر 17 چیمپئن شپ میں کامران پبلک اسکول کی نمائندگی کرتے ہوئے ہیپی پیلس گرامر اسکول کراچی کے خلاف 108 گیندوں پر 117 رنز بنائے۔اوپنر کی حیثیت سے کھیلتے ہوئے وہ 145 منٹ تک کریز پر موجود رہے اور اپنی اننگز میں 11 چوکے لگائے۔ان کے 117 رنز کی بدولت کامران پبلک اسکول نے مقررہ 40 اوورز میں چار وکٹوں کے نقصان پر 297 رنز بنائے اور مقابلہ 172 رنز سے جیت لیا۔اس چیمپئن شپ میں یکم ستمبر 2009ء یا اس کے بعد پیدا ہونے والے کرکٹرز حصہ لے رہے ہیں۔ایڈم گلکرسٹ کی والدہ نے ان کا نام ایڈم رکھا، جبکہ کرکٹ سے محبت کے باعث ان کے والد نے نام کے ساتھ گلکرسٹ کا اضافہ کیا۔نوجوان کرکٹر کا کہنا ہے کہ وہ کمار سنگاکارا جیسا کھلاڑی بننا چاہتے ہیں، جو ان کے پسندیدہ کرکٹر ہیں۔ایڈم گلکرسٹ نے پاکستان کرکٹ بورڈ کے ٹیلنٹ ہنٹ پروگرام کو بھی سراہا، جس کے ذریعے انڈر 15 اور انڈر 17 عمر کے کھلاڑیوں کو اپنی صلاحیتیں دکھانے کے مواقع فراہم کیے جاتے ہیں۔
