تہران( مانیٹرنگ ڈیسک)امریکا کی جانب سے ایران کے منجمد اثاثے خلیجی اتحادیوں کو دینے کی خبروں پر تہران کا سخت ردعمل سامنے آ گیا ہے۔ایران کے نائب وزیرِ خارجہ کاظم غریب آبادی نے کہا ہے کہ علاقائی حکومتیں کسی قسم کے معاوضے کا مطالبہ کرنے کی قانونی یا اخلاقی حیثیت نہیں رکھتیں۔ ان کے مطابق منجمد ایرانی اثاثے نہ تو امریکا کے لیے جنگی وسائل ہیں اور نہ ہی اس کے اتحادی ممالک کے لیے کوئی مالی فنڈ۔یہ ردعمل اس وقت سامنے آیا جب بین الاقوامی خبر رساں ادارے نے ذرائع کے حوالے سے دعویٰ کیا تھا کہ امریکا ایران کے منجمد اثاثے خلیجی اتحادی ممالک کو منتقل کرنے پر غور کر رہا ہے تاکہ مبینہ نقصانات کا ازالہ کیا جا سکے۔رپورٹ کے مطابق امریکی وزیرِ خزانہ اسکاٹ بیسنٹ نے متعلقہ ٹیم کو ہدایت دی ہے کہ خلیجی ممالک کو پہنچنے والے نقصانات کا تفصیلی تخمینہ تیار کیا جائے۔یہ پیش رفت ایسے وقت میں سامنے آئی ہے جب خطے میں سیاسی اور سفارتی کشیدگی پہلے ہی جاری ہے اور فریقین کے درمیان اعتماد کا فقدان برقرار ہے۔
