واشنگٹن (مانیٹرنگ ڈیسک)امریکی صدر ڈونلڈ ٹرمپ نے ایران سے متعلق اپنی پالیسی پر تنقید کرنے والوں کو سخت ردِعمل دیتے ہوئے واضح مؤقف اختیار کیا ہے۔اپنے بیان میں انہوں نے کہا کہ جو افراد سمجھتے ہیں کہ وہ ایران کے معاملے پر نرم رویہ اختیار کر رہے ہیں، وہ یا تو حسد کا شکار ہیں، بدنیت ہیں یا پھر بے وقوف ہیں۔ٹرمپ نے کہا کہ امریکی اسٹاک مارکیٹ ریکارڈ بلند سطح پر پہنچ چکی ہے جبکہ تیل کی قیمتوں میں بھی واضح کمی دیکھی جا رہی ہے، جو ان کی پالیسیوں کا نتیجہ ہے۔واضح رہے کہ امریکا اور ایران کے درمیان جنگ کے خاتمے اور آبنائے ہرمز کو کھولنے سے متعلق ایک مفاہمتی یادداشت پر دستخط کیے جا چکے ہیں، جو مقررہ وقت سے پہلے نافذ العمل ہو گئی ہے۔رپورٹس کے مطابق اس معاہدے پر امریکی صدر ڈونلڈ ٹرمپ نے فرانسیسی صدر ایمانوئل میکرون کی موجودگی میں دستخط کیے، جبکہ ایرانی صدر مسعود پزشکیان نے بھی اس معاہدے کی توثیق کی۔دوسری جانب ایرانی سرکاری میڈیا کی جانب سے جاری تصاویر میں صدر مسعود پزشکیان کو معاہدے پر دستخط کرتے ہوئے دکھایا گیا ہے، جس سے اس سفارتی پیش رفت کی تصدیق کی گئی ہے۔
