ترک اداکارہ ایجے ارتیم 35 سال کی عمر میں دل کا دورہ پڑنے سے انتقال کر گئیں

استنبول( شوبز ڈیسک) استنبول میں معروف ترک ٹیلی وژن اداکارہ ایجے ارتیم 35 سال کی عمر میں دل کا دورہ پڑنے کے باعث انتقال کر گئیں، جبکہ افسوسناک امر یہ ہے کہ وہ اپنی سالگرہ منانے کے صرف ایک روز بعد دنیا سے رخصت ہوئیں۔اداکارہ کے وکیل اوغور گوککویون کے مطابق ایجے ارتیم کو پیر کی دوپہر اپنے گھر میں بے ہوش حالت میں پایا گیا، جہاں وہ اپنی والدہ کے ساتھ مقیم تھیں۔ فوری طبی امداد کے باوجود انہیں بچایا نہ جا سکا۔ابتدائی رپورٹس میں ان کی موت کی وجہ دل کا دورہ قرار دی گئی ہے، تاہم حتمی تصدیق پوسٹ مارٹم رپورٹ کے بعد سامنے آئے گی۔ وکیل نے سوشل میڈیا پر گردش کرنے والی خودکشی سے متعلق خبروں کو بے بنیاد قرار دیتے ہوئے مسترد کر دیا ہے۔ایجے ارتیم 1991 میں ترکی کے شہر سیواس میں پیدا ہوئیں۔ انہوں نے 2014 میں اوپیرا اور ووکل پرفارمنس میں تعلیم مکمل کی اور بعد ازاں اداکاری کی باقاعدہ تربیت حاصل کی۔وہ مقبول ترک ٹی وی ڈرامے "ون لو" میں اپنے کردار "ایشل" کے باعث شہرت رکھتی تھیں، جس نے انہیں ابھرتی ہوئی باصلاحیت اداکاراؤں میں نمایاں مقام دلایا۔ان کے انتقال کی خبر کے بعد ترک شوبز انڈسٹری اور مداحوں میں گہرے دکھ اور افسوس کی فضا پیدا ہو گئی ہے۔