کراچی( شو بز ڈیسک)پاکستان کے معروف اداکار اور میزبان فیصل قریشی نے شادی شدہ بیٹیوں کے ساتھ ناانصافی یا تشدد کی صورت میں ان کا ساتھ نہ دینے والے والدین کے رویے پر سخت تنقید کرتے ہوئے کہا ہے کہ محبت سے پالنے کے بعد ناکام شادی کی وجہ سے بیٹیوں سے منہ موڑ لینا سمجھ سے بالاتر ہے۔حال ہی میں ایک نجی ٹی وی پروگرام میں بطور مہمان شرکت کے دوران فیصل قریشی نے شادی شدہ بیٹیوں سے متعلق اپنے سابقہ بیان پر گفتگو کی۔اداکار کا کہنا تھا کہ وہ اس سوچ کے سخت مخالف ہیں کہ بیٹی کی شادی کے بعد والدین اسے صرف اس وقت گھر واپس قبول کریں جب اس کا جنازہ آئے۔ ان کے مطابق جب بیٹیوں کو اتنی محبت اور توجہ سے پالا جاتا ہے تو شادی کے بعد ان سے لاتعلقی کیسے اختیار کی جاسکتی ہے؟فیصل قریشی نے کہا کہ بعض والدین کو معلوم ہوتا ہے کہ ان کی بیٹی کے ساتھ ناانصافی ہورہی ہے یا اسے تشدد کا نشانہ بنایا جارہا ہے، لیکن اس کے باوجود وہ کہتے ہیں کہ بیٹی کو صرف اس کی لاش کی صورت میں قبول کریں گے۔انہوں نے سوال اٹھایا کہ بیٹیوں کو ایسی صورتحال تک پہنچنے ہی کیوں دیا جائے؟ کیا وہ والدین کی اولاد نہیں ہیں؟ اداکار نے زور دیا کہ اگر بیٹی کے ساتھ ظلم ہورہا ہو تو اسے واپس اپنے گھر لے آنا چاہیے۔
