متحدہ عرب امارات میں 15 سال سے کم عمر بچوں کے سوشل میڈیا استعمال پر پابندی کا اعلان

دبئی( ویب ڈیسک)متحدہ عرب امارات نے 15 سال سے کم عمر بچوں کے سوشل میڈیا استعمال پر پابندی عائد کرنے کا اعلان کیا ہے، جس کے بعد وہ آسٹریلیا، برطانیہ اور کینیڈا سمیت ان ممالک کی فہرست میں شامل ہو گیا ہے جنہوں نے اسی نوعیت کے اقدامات کیے ہیں۔اماراتی کابینہ کی قرارداد کے مطابق سوشل میڈیا پلیٹ فارمز کو پابند کیا گیا ہے کہ وہ 15 سال سے کم عمر صارفین کے اکاؤنٹس کی نگرانی کریں اور انہیں بند کریں۔قرارداد میں یہ بھی واضح کیا گیا ہے کہ اگر پلیٹ فارمز اس اصول پر عمل درآمد نہ کریں تو متعلقہ اکاؤنٹس کو بلاک بھی کیا جا سکتا ہے۔ اس مقصد کے لیے کمپنیوں کو 12 ماہ کی عبوری مدت دی گئی ہے۔سرکاری خبر رساں ادارے وام کے مطابق نئی پالیسی کے تحت سوشل میڈیا استعمال کی کم از کم عمر 15 سال مقرر کر دی گئی ہے، اور اس سے کم عمر بچوں کو ذاتی اکاؤنٹ بنانے یا استعمال کرنے کی اجازت نہیں ہوگی۔اس سے قبل آسٹریلیا نے دسمبر میں 16 سال سے کم عمر بچوں کے سوشل میڈیا استعمال پر پابندی عائد کی تھی، جو اپنی نوعیت کی پہلی عالمی مثال قرار دی گئی تھی۔بعد ازاں برطانیہ سمیت کئی ممالک نے بھی اسی نوعیت کے اقدامات کیے ہیں، جبکہ انڈونیشیا، ملائیشیا، ترکیہ اور یورپ کے متعدد ممالک میں پہلے ہی نوجوانوں کے سوشل میڈیا استعمال پر سخت ضوابط نافذ ہیں۔