برطانیہ میں 14 سالہ لڑکے پر دہشت گردی کی منصوبہ بندی کا مقدمہ درج

لندن( مانیٹرنگ ڈیسک) برطانیہ میں پولیس نے 14 سالہ لڑکے کے خلاف دہشت گردی سے متعلق مقدمہ درج کر لیا ہے۔ اس پر الزام ہے کہ وہ جنوبی لندن کی دو مساجد پر حملے کی منصوبہ بندی کر رہا تھا۔حکام کے مطابق ملزم کا تعلق مبینہ طور پر انتہا پسند دائیں بازو کے نظریات سے ہے۔ خبر رساں ادارے کے مطابق اسے گزشتہ ہفتے ایک گاڑی کو نقصان پہنچانے کے الزام میں گرفتار کیا گیا تھا، تاہم بعد ازاں تلاشی کے دوران ایسے دستاویزات اور دیگر مواد برآمد ہوئے جن کی بنیاد پر اس پر دہشت گردی کی کارروائی کی تیاری سے متعلق دفعات کے تحت فردِ جرم عائد کی گئی۔برطانوی انسدادِ دہشت گردی پولیس کی سربراہ ہیلن فلاناگن نے کہا کہ ایک کم عمر لڑکے کے خلاف اس نوعیت کا مقدمہ انتہائی سنگین معاملہ ہے، جس سے مقامی آبادی اور عوام میں تشویش پیدا ہونا فطری امر ہے۔پولیس کا کہنا ہے کہ ابتدائی تحقیقات سے ایسے شواہد ملے ہیں جن سے ظاہر ہوتا ہے کہ ملزم دہشت گردی کی کارروائی کی تیاری کر رہا تھا، تاہم فی الحال کسی بڑے یا منظم نیٹ ورک سے اس کے تعلق کے شواہد سامنے نہیں آئے۔حکام نے بتایا کہ احتیاطی تدابیر کے طور پر متعلقہ مساجد سے رابطہ کر کے انہیں ضروری سکیورٹی تعاون اور معاونت فراہم کی جا رہی ہے۔