وینکوور( سپورٹس ڈیسک) کینیڈا سپر 60 کے دوسرے سیمی فائنل میں کرکٹ کا ایک انتہائی غیر معمولی منظر دیکھنے میں آیا، جہاں وائیڈ قرار دی جانے والی گیند براہِ راست باؤنڈری کے پار جا پہنچی۔بی سی پلیس میں کھیلے گئے میچ کے دوران مسی ساگا ماسٹرز کے پاکستانی نژاد فاسٹ بولر علی خان نے ٹورنٹو سکسز کے کیرون پولارڈ کو شارٹ پچ گیند کرائی۔گیند نے غیر متوقع انداز میں اچھلتے ہوئے پولارڈ اور وکٹوں کے پیچھے موجود وکٹ کیپر کو عبور کیا اور بغیر زمین سے ٹکرائے باؤنڈری پار چلی گئی۔کمنٹیٹر ڈینی موریسن نے اس دلچسپ صورتحال پر اسے ’’چھ وائیڈز‘‘ قرار دیے جانے کی بحث چھیڑ دی، تاہم امپائر نے پانچ وائیڈز کا اشارہ کیا۔کرکٹ قوانین کے مطابق وائیڈ گیند اگر باؤنڈری تک پہنچ جائے تو مجموعی طور پر پانچ رنز ملتے ہیں، جن میں ایک اضافی وائیڈ رن اور باؤنڈری کے چار رنز شامل ہوتے ہیں، اس لیے اسے چھکا نہیں کہا جا سکتا۔البتہ قوانین کے تحت چھ وائیڈز بننا ممکن ہے، اگر وائیڈ گیند پر بلے باز پانچ رنز دوڑ کر مکمل کرلے۔ ایسی صورت میں ایک وائیڈ اور پانچ دوڑے گئے رنز ملا کر مجموعی اسکور چھ بنتا ہے۔
