واشنگٹن ( شوبز ڈیسک) معروف امریکی اداکار بین جونز 84 سال کی عمر میں انتقال کرگئے۔ وہ مقبول امریکی ٹی وی سیریز ’ڈیوکس آف ہیزرڈ‘ میں کوٹر ڈیونپورٹ کے کردار سے شہرت کی بلندیوں پر پہنچے تھے۔اداکار کی اہلیہ الما ویئٹر نے 9 اگست کو سماجی رابطے کی ویب سائٹ پر ان کے انتقال کی اطلاع دی۔ ان کے مطابق بین جونز گھر پر موجود تھے جہاں انہیں شدید دل کا دورہ پڑا۔اہلیہ نے اپنے جذباتی پیغام میں کہا کہ بین جونز نے زندگی بھرپور انداز میں گزاری اور انہیں بے شمار لوگوں کی محبت حاصل ہوئی، تاہم ان کے بقول انہوں نے اپنی زندگی کی سب سے بڑی محبت کھودی ہے۔بین جونز کے انتقال پر ’ڈیوکس آف ہیزرڈ‘ کے ساتھی اداکار ٹام وپٹ نے بھی انہیں خراج عقیدت پیش کیا۔ انہوں نے کہا کہ ڈرامے نے اپنی کاسٹ کے ایک اہم رکن جبکہ انہوں نے ایک اچھا دوست کھودیا ہے۔بین جونز نے ’ڈیوکس آف ہیزرڈ‘ میں کوٹر ڈیونپورٹ کا کردار ادا کرکے ناظرین کے دلوں میں خاص مقام بنایا اور ان کی اداکاری کو طویل عرصے تک یاد رکھا گیا۔
