کراچی( کامرس ڈیسک) پاکستان اسٹاک ایکسچینج میں کاروباری ہفتے کے آغاز پر شدید مندی دیکھنے میں آئی، جس کے باعث ہنڈرڈ انڈیکس 2700 سے زائد پوائنٹس کمی کے بعد ایک لاکھ 79 ہزار 448 پوائنٹس کی سطح پر آ گیا۔کاروباری دن کے آغاز پر سرمایہ کاروں کی جانب سے محتاط رویہ اختیار کیا گیا، جس کے نتیجے میں مارکیٹ میں فروخت کا دباؤ بڑھ گیا۔واضح رہے کہ گزشتہ کاروباری ہفتے کے آخری روز پاکستان اسٹاک ایکسچینج کا ہنڈرڈ انڈیکس 982 پوائنٹس اضافے کے ساتھ ایک لاکھ 82 ہزار 241 پوائنٹس کی سطح پر بند ہوا تھا۔دوسری جانب امریکا اور ایران کے درمیان بڑھتی ہوئی کشیدگی کے باعث ایشیا کی بڑی اسٹاک مارکیٹس میں بھی مندی کا رجحان دیکھا گیا۔خبر ایجنسی کے مطابق جنوبی کوریا کے کوسپی انڈیکس میں 8 فیصد سے زائد کمی ریکارڈ کی گئی، جبکہ جاپان کے نکی انڈیکس میں ڈھائی فیصد سے زیادہ گراوٹ دیکھی گئی۔چین کے شنگھائی کمپوزٹ انڈیکس میں 1.54 فیصد کمی ہوئی، جبکہ ہانگ کانگ کے ہینگ سینگ انڈیکس میں بھی معمولی مندی کا رجحان برقرار رہا۔
