لبنان، اسرائیل اور امریکہ کے درمیان سہ فریقی معاہدہ تنازعات کے خاتمے کی طرف اہم قدم قرار

واشنگٹن(مانیٹرنگ ڈیسک) امریکی محکمہ خارجہ کے ترجمان ٹومی پگٹ نے کہا ہے کہ لبنان، اسرائیل اور امریکہ کے درمیان طے پانے والا سہ فریقی معاہدہ ایک واضح اور مؤثر راستہ فراہم کرتا ہے، جو خطے میں جاری طویل تنازعات کے سلسلے کو ختم کرنے میں مددگار ثابت ہو سکتا ہے۔امریکی محکمہ خارجہ کے ترجمان نے الجزیرہ کو دیے گئے انٹرویو میں کہا کہ یہ معاہدہ لامتناہی تنازع کے چکر کو ختم کرنے کی ایک کوشش ہے، جس کے تحت لبنان کی حکومت کی خودمختاری کو بحال کیا جا رہا ہے جبکہ اسرائیل کی سلامتی کو بھی یقینی بنایا جا رہا ہے۔ترجمان کے مطابق امریکہ مسلسل اس عزم کا اظہار کر رہا ہے کہ لبنان کی حکومت کی صلاحیت اور ادارہ جاتی طاقت کو مزید مضبوط بنایا جائے۔ اس عمل کے تحت ابتدائی طور پر ایسے تجرباتی زونز قائم کیے جا رہے ہیں جہاں لبنان اپنی خودمختاری کو دوبارہ مستحکم کرنا شروع کرے گا۔اس حوالے سے امریکی محکمہ خارجہ کا کہنا ہے کہ یہ اقدامات خطے میں دیرپا امن اور استحکام کی کوششوں کا حصہ ہیں۔