اسلام آباد( پاکستان خبر) وزیراعظم شہباز شریف نے کہا ہے کہ پاکستان پائیدار علاقائی امن کے قیام کے لیے پُرعزم ہے، جبکہ عالمی معاہدوں پر ان کی روح کے مطابق مکمل عمل درآمد ضروری ہے۔ انہوں نے واضح کیا کہ پانی خطے کی زندگی اور آئندہ نسلوں کے مستقبل کی ضمانت ہے، اسے سیاسی مقاصد یا دباؤ کے ذریعے کے طور پر استعمال کرنا ناقابل قبول ہے۔شنگھائی تعاون تنظیم کے سربراہ اجلاس سے خطاب کرتے ہوئے وزیراعظم نے کہا کہ تاریخی اجلاس میں شرکت ان کے لیے باعثِ اعزاز ہے۔ شنگھائی تعاون تنظیم عالمی امن اور استحکام کے لیے ایک اہم پلیٹ فارم کی حیثیت رکھتی ہے، جبکہ تنظیم کے قیام کے 25 برس مکمل ہونا بھی ایک اہم سنگِ میل ہے۔شہباز شریف نے کہا کہ پاکستان شنگھائی تعاون تنظیم کا فعال اور ذمہ دار رکن ہے۔ موجودہ عالمی منظرنامہ بڑھتی ہوئی جغرافیائی کشیدگی سے دوچار ہے، ایسے میں تنظیم مشترکہ چیلنجز سے نمٹنے کے اجتماعی عزم کی نمائندگی کرتی ہے۔ پاکستان تنازعات کے پُرامن حل اور بین الاقوامی قانون کی بالادستی پر یقین رکھتا ہے۔وزیراعظم کا کہنا تھا کہ پاکستان نے علاقائی بحران کے دوران قیامِ امن کے لیے مؤثر کردار ادا کیا۔ پاکستانی سفارتی کوششوں کے نتیجے میں اسلام آباد مفاہمتی یادداشت پر دستخط ممکن ہوئے، جو خطے میں کشیدگی کم کرنے کی سمت ایک اہم پیش رفت ہے۔
