کیلیفورنیا (ویب ڈیسک)واٹس ایپ نے صارفین کو ممکنہ فراڈ سے محفوظ رکھنے کے لیے نئے اسکام الرٹ فیچر کی آزمائش شروع کردی ہے، جو فی الحال اینڈرائیڈ کے نئے آزمائشی ورژن میں پیش کیا گیا ہے۔ویب سائٹ وا بیٹا انفو کے مطابق اس فیچر کا مقصد نامعلوم رابطوں کی جانب سے بھیجے جانے والے ممکنہ فراڈ پیغامات کے بارے میں صارفین کو بروقت آگاہ کرنا ہے۔ ممکنہ خطرے کی صورت میں انتباہ براہ راست چیٹ میں ظاہر ہوگا، جس کے بعد صارف یہ فیصلہ کرسکے گا کہ پیغام بھیجنے والے کو بلاک اور رپورٹ کرنا ہے یا چیٹ پر اعتماد کرنا ہے۔رپورٹ کے مطابق یہ فیچر فراڈ کی کوشش کو خودکار طور پر نہیں روکے گا بلکہ صارف کو ممکنہ خطرے سے متعلق اضافی معلومات فراہم کرے گا تاکہ وہ خود مناسب فیصلہ کرسکے۔اسکام الرٹ فیچر اختیاری ہوگا اور پہلے سے فعال نہیں ہوگا۔ صارفین اسے اینڈرائیڈ ڈیوائسز میں واٹس ایپ کی ترتیبات کے اکاؤنٹس کے حصے میں جاکر فعال کرسکیں گے۔میٹا کے مطابق یہ فیچر ڈیوائس میں موجود مشین لرننگ ماڈل کے ذریعے ممکنہ فراڈ پیغامات کا تجزیہ کرے گا۔ اس دوران پیغامات کا مواد کمپنی کے سرورز پر منتقل نہیں کیا جائے گا، جس سے اینڈ ٹو اینڈ انکرپشن کا تحفظ برقرار رہے گا۔یہ فیچر فی الحال آزمائشی مرحلے میں ہے، اس لیے تمام صارفین کے لیے اس کی باضابطہ دستیابی کی تاریخ ابھی واضح نہیں ہے۔
