کیلیفورنیا( ویب ڈیسک) سائنسدانوں نے وائی فائی ٹیکنالوجی کا ایک ایسا حیران کن استعمال دریافت کیا ہے جس کے ذریعے کیمرے یا اضافی سینسرز کے بغیر بھی لوگوں کی شناخت ممکن ہوسکتی ہے۔جرمنی کے انسٹیٹیوٹ آف انفارمیشن سکیورٹی اینڈ ڈیپنڈایبلٹی کی تحقیق میں 197 افراد کو شامل کیا گیا، جس کے دوران ایک کنٹرول ماحول میں وائی فائی سگنلز کی مدد سے افراد کی شناخت تقریباً 100 فیصد درستگی سے کی گئی۔محققین کے مطابق یہ طریقہ ان ریڈیو سگنلز کے تجزیے پر مبنی ہے جو وائرلیس ڈیوائسز سے خارج ہو کر اردگرد کے ماحول سے منعکس ہوتے ہیں۔ ان سگنلز کا تجزیہ کرکے نظام کسی جگہ موجود افراد کی شناخت اور ان کی موجودگی کی تصویر نما معلومات حاصل کرسکتا ہے۔تحقیق میں بتایا گیا کہ اس مقصد کے لیے عام وائی فائی آلات ہی کافی ہوسکتے ہیں اور متعلقہ شخص کے پاس اسمارٹ فون یا کوئی وائی فائی ڈیوائس ہونا بھی ضروری نہیں۔محققین کا کہنا ہے کہ یہ ٹیکنالوجی روایتی کیمرے کی طرح معلومات حاصل کرسکتی ہے، تاہم اس میں روشنی کی لہروں کے بجائے ریڈیو لہروں کو استعمال کیا جاتا ہے۔ماہرین نے خبردار کیا کہ وائرلیس نیٹ ورکس کا اس طرح استعمال رازداری اور پرائیویسی کے لیے سنگین خطرہ بن سکتا ہے، کیونکہ مستقبل میں وائی فائی نیٹ ورکس کو لوگوں کی لاعلمی میں وسیع پیمانے پر نگرانی کے لیے استعمال کیا جاسکتا ہے۔
