لاہور( سپورٹس ڈیسک) ویمنز انڈر 19 ایشیا کپ اور ورلڈ کپ کی تیاریوں کے سلسلے میں نیشنل ویمنز انڈر 19 ٹورنامنٹ 20 اگست سے کراچی میں شروع ہوگا، جو 4 ستمبر تک جاری رہے گا۔ایونٹ میں پانچ ٹیمیں کانکررز، چیلنجرز، سٹرائیکرز، اسٹارز اور انونسیبلز حصہ لیں گی، جبکہ کراچی کے دو مختلف میدانوں میں کھیلے جانے والے ٹورنامنٹ میں 75 انڈر 19 خواتین کرکٹرز شرکت کریں گی۔فضا فیاض، کومل خان، سمیع افسر، رویل فرحان اور ضوفشاں ایاز پانچوں ٹیموں کی قیادت کریں گی۔ٹورنامنٹ کے ابتدائی 10 میچز 30 اوورز کے ہوں گے، جبکہ آخری 10 مقابلے اور فائنل ٹی ٹوئنٹی فارمیٹ میں کھیلے جائیں گے۔ہر ٹیم 8 میچز کھیلے گی اور پوائنٹس ٹیبل کی سرفہرست دو ٹیمیں فائنل میں مدمقابل ہوں گی۔ فاتح ٹیم کو 10 لاکھ روپے جبکہ رنرز اپ کو 7 لاکھ 50 ہزار روپے انعام دیا جائے گا۔ٹورنامنٹ پاکستان ویمنز انڈر 19 ٹیم کی ایشیا کپ اور انڈر 19 ورلڈ کپ کی تیاریوں میں اہم کردار ادا کرے گا۔
