ممبئی( شو بز ڈیسک)بھارتی اداکارہ انترا بینرجی غلط شناخت کے باعث سوشل میڈیا پر پھیلنے والی جعلی خبر کا نشانہ بن گئیں، جس میں ان پر ٹرین میں ریلوے پروٹیکشن فورس کے اہلکار پر بلیڈ سے حملہ کرنے اور گرفتاری کا الزام عائد کیا گیا تھا۔اداکارہ کے مطابق انہیں اتوار کی صبح جم جاتے ہوئے اس خبر کے بارے میں پہلی کال موصول ہوئی، جس کے بعد دن بھر میں 400 سے زائد فون کالز آئیں۔ وہ مسلسل اپنے اہل خانہ اور دیگر جاننے والوں کو وضاحت دیتی رہیں کہ خبر میں جس خاتون کا ذکر ہے، وہ نہیں ہیں۔انترا نے بتایا کہ ایک آن لائن خبر میں صبح ان کا نام استعمال کیا گیا، جبکہ رات تک یہی خبر ان کی تصویر اور نام کے ساتھ مختلف سوشل میڈیا پلیٹ فارمز پر گردش کرنے لگی۔دراصل یہ معاملہ انترا سوہَم بینرجی نامی ایک دوسری خاتون سے متعلق تھا، جنہیں 12 اگست کو مبینہ طور پر ٹرین میں ریلوے پولیس اہلکاروں سے جھگڑے اور بعدازاں بلیڈ سے حملے کے الزام میں گرفتار کیا گیا تھا اور ان کے خلاف مقدمہ بھی درج کیا گیا۔اداکارہ کے مطابق ایف آئی آر کی جانچ کے دوران واضح ہوا کہ دونوں خواتین کے نام اور دیگر کوائف مختلف ہیں۔ مبینہ ملزمہ کے والد کا نام سوہَم ہے جبکہ اداکارہ کے والد کا نام سبرتا بینرجی ہے، اسی طرح ملزمہ کا پتہ تھانے کا درج ہے جبکہ اداکارہ جوگیشوری، اندھیری ویسٹ میں مقیم ہیں۔انترا بینرجی نے سوال اٹھایا کہ مناسب تصدیق کے بغیر کسی شخص کی تصویر اور نام کو کسی خبر کے ساتھ کیسے استعمال کیا جاسکتا ہے۔
