کراچی( شوبز ڈیسک)اداکارہ زینب راجہ نے اداکار فہد شیخ کے رویے پر تنقید کرتے ہوئے کہا ہے کہ وہ مذاق کے نام پر اکثر ساتھی فنکاروں کو غیر آرام دہ صورتحال کا سامنا کرواتے تھے۔زینب راجہ کا ایک تبصرہ سوشل میڈیا پر وائرل ہو رہا ہے، جس میں انہوں نے ایک ڈرامے میں فہد شیخ کے ساتھ کام کرنے کے تجربے کا ذکر کیا۔اداکارہ نے لکھا کہ انہوں نے فہد شیخ کے ساتھ کام کیا ہے اور وہ مذاق کے نام پر لوگوں کو بے آرام محسوس کرواتے تھے۔زینب راجہ نے سینئر اداکار اور مصنف سید محمد احمد سے متعلق حالیہ معاملے پر بھی افسوس کا اظہار کیا۔انہوں نے کہا کہ محمد احمد صاحب کے ساتھ پیش آنے والا واقعہ دل دکھانے والا اور شرمناک ہے، وہ تصور بھی نہیں کر سکتیں کہ کوئی کسی کے والدین کے ساتھ ایسا رویہ اختیار کرے، خاص طور پر ایک ایسے اچھے انسان کے ساتھ۔واضح رہے کہ سید محمد احمد نے ایک حالیہ پوڈکاسٹ میں دعویٰ کیا تھا کہ ایک نوجوان مرکزی اداکار نے شوٹنگ کے دوران ان کی شکل، گنج پن اور اداکاری کا مذاق اڑایا۔اگرچہ انہوں نے اداکار کا نام ظاہر نہیں کیا، تاہم ایک مبینہ ویڈیو سامنے آنے کے بعد سوشل میڈیا پر مختلف قیاس آرائیاں شروع ہو گئی ہیں۔
