ممبئی( شوبز ڈیسک)بھارت کے نامور مزاحیہ فنکار ذاکر خان نے سماجی رابطوں کی ویب گاہوں پر گردش کرنے والی اپنی صحت سے متعلق افواہوں پر ردعمل دیتے ہوئے اسٹیج سے طویل وقفہ لینے کی اصل وجہ بیان کردی۔مشہور اسٹیج مزاح نگار نے شوز سے وقفہ لینے کے اعلان کے بعد اپنی طبیعت کے بارے میں پھیلائی جانے والی خبروں کی تردید کرتے ہوئے واضح کیا کہ انہیں کوئی سنگین عارضہ لاحق نہیں۔ ان کا کہنا تھا کہ طبیعت معمولی خراب ہے مگر تشویش کی کوئی بات نہیں۔ایک تقریب کے دوران اٹھتیس سالہ فنکار نے مداحوں سے گفتگو کرتے ہوئے کہا کہ سماجی رابطوں پر جو کچھ پڑھا جا رہا ہے وہ درست نہیں۔ انہوں نے اس تاثر کو بھی غلط قرار دیا کہ وہ کسی انتہائی سنگین مرحلے میں ہیں۔ذاکر خان نے مزید کہا کہ گزشتہ چھ برس سے تحریر کا کام بے حد بڑھ گیا تھا جس کے باعث وہ اسے مناسب انداز میں مکمل نہیں کر پا رہے تھے، اسی وجہ سے انہوں نے اسٹیج سے عارضی وقفہ لینے کا فیصلہ کیا۔
