ممبئی (شوبز ڈیسک) بالی ووڈ اداکارہ دیا مرزا نے انکشاف کیا ہے کہ انہیں فلمی دنیا میں آنے اور اداکاری اختیار کرنے پر آمادہ کرنے والے پہلے شخص انیل کپور تھے۔اس سال اپنے فلمی کیریئر کے 25 سال مکمل کرنے والی 44 سالہ اداکارہ ان دنوں متعدد فلمی منصوبوں میں مصروف ہیں۔ حال ہی میں ان کی فلم ’اکا‘ ریلیز ہوئی ہے، جبکہ عالیہ بھٹ اور شرواری کی فلم ’الفا‘ میں بھی وہ انیل کپور کے مدمقابل مختصر کردار میں نظر آئیں گی۔دیا مرزا نے بتایا کہ ایشیا پیسیفک مقابلۂ حسن کے فوراً بعد انیل کپور اور انوپم کھیر نے ان سے ملاقات کی اور انہیں فلموں میں کام کرنے کی بھرپور حوصلہ افزائی کی۔ ان کے بقول، انہی دونوں شخصیات نے انہیں پہلی فلم حاصل کرنے میں بھی مدد دی۔انہوں نے کہا کہ فلم ’الفا‘ میں 25 برس بعد انیل کپور کے ساتھ اسکرین شیئر کرنا ان کے لیے ایک خوبصورت اور یادگار لمحہ ہے۔ ان کے مطابق پہلی ملاقات حیدرآباد کے ایک ہوٹل کی لابی میں ہوئی تھی، جہاں انیل کپور نے انہیں اداکاری کے میدان میں آنے کا مشورہ دیا تھا۔دیا مرزا نے بتایا کہ انیل کپور نے اس وقت ان سے کہا تھا، ’’تم بہت خوبصورت ہو، تم میں بہت وقار ہے، تم اسکرین پر بہت اچھی لگو گی، تمہیں ایک اداکار بننا چاہیے۔‘‘
