دبئی میں 200 ارب درہم کا عظیم ماسٹر ڈویلپمنٹ منصوبہ شروع کرنے کا اعلان

دبئی( مانیٹرنگ ڈیسک) ایمار پراپرٹیز نے دبئی میں دو سو ارب درہم مالیت کے ایک بڑے نئے ماسٹر ڈویلپمنٹ منصوبے کا اعلان کیا ہے، جسے کمپنی اپنی تاریخ کا سب سے بلند حوصلہ شہری منصوبہ قرار دے رہی ہے۔رپورٹس کے مطابق یہ منصوبہ جدید شہری طرزِ زندگی کے مربوط تصور کو فروغ دینے کے لیے تیار کیا جا رہا ہے۔ اس کا مجموعی تعمیراتی رقبہ 4.5 ملین مربع میٹر سے زائد ہوگا، جس میں لگژری رہائشی ٹاورز، ولاز، محلات، تجارتی دفاتر، ریٹیل مراکز، ہوٹلز اور مختلف شہری و ثقافتی سہولیات شامل ہوں گی۔یہ منصوبہ تقریباً ایک لاکھ پچاس ہزار افراد کی رہائش کے لیے ڈیزائن کیا جا رہا ہے اور اسے ایک مکمل خود کفیل “شہر کے اندر شہر” کے طور پر پیش کیا جا رہا ہے۔ماسٹر پلان کے تحت پانچ مختلف زونز شامل ہوں گے، جن میں کاروباری مرکز، شہری ضلع، نوجوان خاندانوں کی کمیونٹی، خاندانی رہائشی زون اور لگژری ولا ایریا شامل ہیں۔ اس کے علاوہ منصوبے میں تعلیمی ادارے، صحت کی سہولیات، مساجد، پارکس، ریٹیل مراکز، اسمارٹ ٹیکنالوجی، ماحول دوست ٹرانسپورٹ اور ممکنہ میٹرو رابطہ بھی شامل کیا جائے گا۔ایمار کے بانی محمد العبار نے کہا ہے کہ بڑے شہر خوابوں سے بنتے ہیں اور یہ منصوبہ کمپنی کا اب تک کا سب سے بڑا اور بلند حوصلہ وژن ہے۔ تاہم اس منصوبے کے مقام، مرحلہ وار تعمیر اور مالی تفصیلات ابھی مکمل طور پر ظاہر نہیں کی گئیں۔