کراچی (شوبز ڈیسک) پاکستانی اداکارہ عائشہ عمر نے کراچی میں زندگی گزارنے والے شہریوں کو مشکلات کا سامنا کرنے پر میڈل کا مستحق قرار دے دیا۔برطانوی تحقیقی ادارے دی اکانومسٹ انٹیلی جنس یونٹ (ای آئی یو) کی جانب سے جاری کردہ گلوبل لائیویبلٹی انڈیکس 2026 کے مطابق کراچی کو رہائش کے لیے دنیا کے بدترین شہروں میں شمار کیا گیا ہے اور اسے چوتھا کم قابلِ رہائش شہر قرار دیا گیا ہے۔عائشہ عمر نے اس رپورٹ پر مبنی ایک پوسٹ اپنی انسٹاگرام اسٹوری پر شیئر کرتے ہوئے کراچی کے حالات پر اپنے خیالات کا اظہار کیا۔اداکارہ نے لکھا کہ اس رپورٹ پر انہیں کوئی حیرت نہیں ہوئی۔ ان کے مطابق کراچی میں رہنے اور زندگی گزارنے والے افراد اس جدوجہد پر تمغوں کے مستحق ہیں۔انہوں نے کہا کہ شہری خراب اور آلودہ سڑکوں پر سفر کرتے ہیں، گھنٹوں ٹریفک جام کا سامنا کرتے ہیں، گھروں میں گیس اور بجلی کی محدود فراہمی کے باوجود زندگی جاری رکھتے ہیں، جبکہ جرائم کے خوف، مسلسل دباؤ اور مشکلات کے ماحول میں محنت کرتے ہوئے اپنے فرائض انجام دیتے ہیں۔عائشہ عمر نے مزید کہا کہ شہری تمام ٹیکس ادا کرتے ہیں اور ملکی معیشت میں اپنا کردار ادا کرتے ہیں، اس کے باوجود روزمرہ زندگی میں متعدد مسائل کا سامنا کرتے ہیں۔واضح رہے کہ عائشہ عمر اس سے قبل بھی پاکستان کو درپیش سماجی مسائل پر اپنی رائے کا اظہار کرتی رہی ہیں۔ حال ہی میں وہ بی بی سی کی ایک عالمی خواتین سے متعلق رپورٹ کا حصہ بھی بنی تھیں، جس میں انہوں نے ٹیکنالوجی کمپنیوں اور مصنوعی ذہانت تیار کرنے والے اداروں پر زور دیا تھا کہ وہ تصاویر کے ذریعے ہونے والی آن لائن ہراسانی کے مسئلے کو سنجیدگی سے حل کریں۔
