ممبئی( سپورٹس ڈیسک)بھارتی کرکٹ بورڈ (بی سی سی آئی) نے روہت شرما کے ون ڈے فارمیٹ میں مستقبل سے متعلق خبروں اور قیاس آرائیوں پر ناراضی کا اظہار کرتے ہوئے قومی ٹیم کے سلیکٹرز کو میڈیا سے گفتگو سے گریز کی ہدایت کی ہے۔بھارتی میڈیا رپورٹس کے مطابق روہت شرما کے ون ڈے کیریئر کے مستقبل پر مسلسل بحث جاری ہے، تاہم بورڈ کے سیکریٹری دیواجیت سائیکیا نے ان خبروں کو مسترد کرتے ہوئے کہا ہے کہ روہت شرما اس وقت تک ٹیم کی نمائندگی کرتے رہیں گے جب تک وہ ٹیم کے منصوبوں کا حصہ ہیں۔رپورٹس میں یہ بھی بتایا گیا ہے کہ روہت شرما کی حالیہ کارکردگی سلیکٹرز کو مکمل طور پر مطمئن نہیں کر سکی۔ انہوں نے گزشتہ 8 ون ڈے اننگز میں 241 رنز اسکور کیے، جہاں ان کی اوسط 30.12 اور اسٹرائیک ریٹ 88.60 رہا۔
