ممبئی( شوبز ڈیسک)بالی ووڈ کی معروف اداکارہ اور رقاصہ نورا فتیحی کو عالمی امن کے حق میں آواز بلند کرنے پر سماجی رابطہ ذرائع پر تنقید کا سامنا کرنا پڑا تاہم انہوں نے ناقدین کو واضح اور سخت جواب دے دیا۔چونتیس سالہ کینیڈا نژاد اداکارہ نے حال ہی میں انسٹاگرام پر ایک پیغام جاری کیا تھا جس میں انہوں نے ایران پر امریکا اور اسرائیل کے مشترکہ حملوں کی مذمت کرتے ہوئے دنیا بھر میں امن اور یکجہتی کی ضرورت پر زور دیا۔نورا فتیحی کے اس بیان کے بعد بعض حلقوں کی جانب سے انہیں شدید تنقید کا نشانہ بنایا گیا اور خاص طور پر مسلمانوں کے حق میں آواز اٹھانے کے الزام پر انہیں تنقیدی تبصروں کا سامنا کرنا پڑا۔اس صورت حال کے بعد اداکارہ نے ایک نئی ویڈیو جاری کی جس میں انہوں نے ان افراد کو مخاطب کیا جو ان کے مؤقف کو غلط انداز میں پیش کر رہے تھے۔ویڈیو میں ان کا کہنا تھا کہ لوگ بات سننے اور سمجھنے کی صلاحیت کھوتے جا رہے ہیں حالانکہ تنقیدی سوچ وہ بنیادی صلاحیت ہے جو تعلیم کے دوران ہر انسان سیکھتا ہے۔اداکارہ نے واضح کیا کہ ان کا امن اور اتحاد کا پیغام کسی ایک قوم، ملک یا مذہب کے لیے نہیں بلکہ پوری انسانیت کے لیے ہے۔ان کے مطابق اگر امن کی اپیل کسی کو مشتعل کرتی ہے تو اسے اپنے طرز فکر پر غور کرنے کی ضرورت ہے کیونکہ افراتفری کے خلاف آواز اٹھانا کسی کو دشمن نہیں بناتا۔
