لاہور( شو بز ڈیسک)پاکستان کے معروف گلوکار فلک شبیر حالیہ دنوں ایک بیان کے باعث عوامی بحث کی زد میں آ گئے ہیں۔انہوں نے پنجاب حکومت کی جانب سے تمباکو کے جدید الیکٹرانک آلات کے خلاف اقدامات کو سراہتے ہوئے اسے ایک مثبت قدم قرار دیا۔ تاہم انہوں نے وزیر اعلیٰ پنجاب مریم نواز سے یہ بھی درخواست کی کہ بازاروں اور سڑکوں جیسے عوامی مقامات پر لباس کے حوالے سے ضابطۂ اخلاق پر غور کیا جائے۔اپنے پیغام میں فلک شبیر نے کہا کہ بطور دو بیٹیوں کے والد وہ چاہتے ہیں کہ عوامی مقامات پر لباس کے انتخاب سے متعلق کچھ رہنما اصول بنائے جائیں۔انہوں نے یہ بھی مطالبہ کیا کہ عوامی جگہوں پر مختصر لباس پہننے پر پابندی عائد کی جائے، ان کے مطابق ایسے اقدامات معاشرتی اور ثقافتی اقدار کے تحفظ میں مددگار ثابت ہو سکتے ہیں۔ان کی اہلیہ اور اداکارہ سارہ خان نے بھی ان کا یہ پیغام آگے شیئر کیا۔دوسری جانب سماجی رابطے کی ویب سائٹس پر متعدد صارفین نے اس مؤقف پر تنقید کی۔ بعض افراد کا کہنا تھا کہ چونکہ فلک شبیر خود اپنے خاندان کے ساتھ برطانیہ میں رہائش پذیر ہیں، اس لیے انہیں دوسروں کے لباس کے انتخاب پر رائے دینے کے بجائے ذاتی آزادی کا احترام کرنا چاہیے۔کچھ صارفین نے اس بیان کو غیر ضروری اخلاقی نگرانی قرار دیا جبکہ دیگر نے اسے توجہ حاصل کرنے کی کوشش سے تعبیر کیا۔
