نئی دہلی ( شوبز ڈیسک) بھارتی موسیقی کی معروف گلوکارہ سمن کلیان پور 89 برس کی عمر میں انتقال کر گئیں۔بھارتی میڈیا رپورٹس کے مطابق وہ اتوار کی شام ممبئی میں اپنی رہائش گاہ پر عمر رسیدگی سے متعلق مختلف بیماریوں کے باعث وفات پا گئیں۔سمن کلیان پور 1960 اور 1970 کی دہائی میں اپنی مدھر اور سریلی آواز کے باعث بے حد مقبول رہیں۔ ان کے مشہور گیتوں میں “نہ نہ کرتے پیار تم ہی سے کر بیٹھے”، “تم نے پکارا اور ہم چلے آئے” اور “آج کل تیرے میرے پیار کے چرچے” شامل ہیں۔انہوں نے ہندی کے علاوہ مراٹھی، آسامی، کنڑ، بنگالی اور اوڑیا سمیت کئی علاقائی زبانوں میں بھی گیت گائے۔ اس کے ساتھ ساتھ وہ بھجن، غزل اور ٹھمری کے انداز میں بھی اپنی گلوکاری کا لوہا منوا چکی تھیں۔قریبی ذرائع کے مطابق سمن کلیان پور اپنی زندگی کے آخری ایام میں اپنے ہی گائے ہوئے گیت سنتی رہیں۔ ان کی قریبی دوست اور سوانح نگار منگلا کے مطابق وہ دنیا سے رخصت ہونے سے قبل مسلسل اپنی یادگار موسیقی سے جڑی رہیں۔ان کے انتقال پر بھارت کی موسیقی کی دنیا میں گہرے دکھ اور افسوس کا اظہار کیا جا رہا ہے۔
