ممبئی( شو بز ڈیسک)بھارتی پنجابی گلوکارہ جیسمین سینڈلاس کے دہرادن میں ہونے والے کنسرٹ کی ایک ویڈیو سوشل میڈیا پر وائرل ہو گئی، جس کے بعد مداحوں نے ان کی حفاظت اور سیکیورٹی سے متعلق تشویش کا اظہار کیا ہے۔جیسمین سینڈلاس نے پریڈ گراؤنڈ میں منعقدہ مفت کنسرٹ میں اپنے مشہور گانے سپ سپ، شرارت اور لاواں پیش کیے، جہاں ہزاروں شائقین موجود تھے۔وائرل ویڈیو میں گلوکارہ کو پرفارمنس کے بعد اسٹیج کے قریب مداحوں سے ملاقات کرتے، پھول وصول کرتے اور ان کے ساتھ وقت گزارتے ہوئے دیکھا جا سکتا ہے۔ویڈیو سامنے آنے کے بعد بعض صارفین نے دعویٰ کیا کہ چند افراد نے گلوکارہ کے ساتھ نامناسب رویہ اختیار کیا، جس پر سوشل میڈیا صارفین نے شدید ردعمل کا اظہار کرتے ہوئے فنکاروں کی ذاتی حدود، عزت اور تحفظ کو یقینی بنانے پر زور دیا۔یہ واقعہ ایسے وقت پیش آیا جب اسی کنسرٹ کے دوران جیسمین سینڈلاس نے اپنے منگیتر شیکھر چودھری کو اسٹیج پر بلا کر اپنی منگنی کا اعلان کیا تھا، جس کی ویڈیوز بھی سوشل میڈیا پر وائرل ہوئی تھیں۔ تاہم بعد میں سامنے آنے والی ویڈیو نے لوگوں کی توجہ مبینہ ناخوشگوار واقعے کی جانب مبذول کرا دی۔
