شاہ رخ خان کی پرفارمنس چھوڑ کر مائیکل جیکسن سے ملاقات کو ترجیح دی،فرح خان کا انکشاف

ممبئی( شو بز ڈیسک)بالی ووڈ کی معروف ہدایت کار، کوریوگرافر اور پروڈیوسر فرح خان نے ایک دلچسپ واقعہ سناتے ہوئے انکشاف کیا ہے کہ انہوں نے اپنے قریبی دوست اور سپر اسٹار شاہ رخ خان کی پرفارمنس چھوڑ کر عالمی شہرت یافتہ گلوکار مائیکل جیکسن سے ملاقات کو ترجیح دی تھی۔ایک گفتگو کے دوران فرح خان نے بتایا کہ وہ ایک تقریب میں شاہ رخ خان، ایشوریہ رائے اور دیگر ستاروں کی پرفارمنس کی کوریوگرافی کے لیے موجود تھیں۔ اسی دوران انہیں اطلاع ملی کہ مائیکل جیکسن بطور مہمان خصوصی تقریب میں آ رہے ہیں۔ان کے مطابق جب شاہ رخ خان کی پرفارمنس شروع ہونے والی تھی تو اسپانسر نے انہیں بتایا کہ مائیکل جیکسن آ رہے ہیں، جس پر وہ اس موقع پر اسٹیج سے ہٹ گئیں۔فرح خان نے ہنستے ہوئے بتایا کہ انہوں نے اسپانسر کے پوچھنے پر کہا کہ “شاہ رخ خان بعد میں بھی مل سکتے ہیں”، جبکہ مائیکل جیکسن سے ملاقات کو انہوں نے زیادہ اہم سمجھا۔انہوں نے مزید بتایا کہ مائیکل جیکسن نہایت نرم مزاج تھے اور ملاقات کے دوران انہوں نے ان کے نام کی تعریف کرتے ہوئے اسے طاقتور نام قرار دیا۔فرح خان کے مطابق یہ ملاقات اور یادگار لمحہ ان کی زندگی کی سب سے قیمتی یادوں میں سے ایک ہے۔