کراچی( شوبز ڈیسک)پاکستان کی معروف فلمی اداکارہ ریشم نے کہا ہے کہ انہیں خدشہ ہے کہیں کوئی شخص محض شہرت حاصل کرنے کے لیے ان سے شادی نہ کر لے۔ انہوں نے ان خیالات کا اظہار ایک نجی ٹی وی پروگرام میں بطور مہمان گفتگو کرتے ہوئے کیا، جہاں انہوں نے اپنی نجی زندگی کے مختلف پہلوؤں پر کھل کر بات کی۔گفتگو کے دوران اداکارہ نے بتایا کہ وہ طویل عرصے سے شوبز انڈسٹری میں مسلسل کام کر رہی ہیں اور ایک خود مختار و محنتی خاتون ہونے کے ناطے اللہ کا شکر ادا کرتی ہیں، تاہم ان کے مطابق ایسا محسوس ہوتا ہے کہ ان کی قسمت میں کسی مرد کی کمائی شامل نہیں۔ریشم، جو تاحال غیر شادی شدہ ہیں، کا کہنا تھا کہ وہ ہمیشہ یہ سوچتی رہیں کہ زندگی کے کسی مرحلے پر شادی ہو جائے گی، مگر اب تک ایسا ممکن نہیں ہو سکا۔ انہوں نے موجودہ دور میں شادیوں کے جلد ختم ہونے کے بڑھتے رجحان پر بھی تشویش کا اظہار کیا۔اداکارہ فلاحی سرگرمیوں میں بھی بڑھ چڑھ کر حصہ لیتی ہیں اور لنگر تقسیم کرتی ہیں۔ ان کا کہنا تھا کہ وہ چاہتی ہیں کہ ان کا شریکِ حیات بھی اس نیک مقصد میں ان کا ساتھ دے۔ انہوں نے اپنی خواہش کا اظہار کرتے ہوئے کہا کہ وہ ایک اچھے انسان سے شادی کی خواہاں ہیں، جو انہیں مالی وسائل فراہم کرے تاکہ وہ اس رقم کو فلاحی کاموں اور لنگر کے انتظام پر خرچ کر سکیں۔ریشم نے مزید کہا کہ سوشل میڈیا کے اس دور میں وقتی شہرت کے لیے تعلقات قائم کرنے کا رجحان بڑھ گیا ہے، اور وہ کسی ایسے شخص کے ساتھ زندگی گزارنے کا تصور بھی نہیں کر سکتیں جو وقتی مقاصد کے بعد انہیں تنہا چھوڑ دے۔
