ممبئی( شوبز ڈیسک)بھارتی شوبز شخصیات کرشنا ابھیشیک اور ان کی مامی سنیتا آہوجا کے درمیان برسوں پرانی ناراضی بالآخر ختم ہو گئی اور دونوں کے تعلقات بحال ہو گئے۔دونوں کے درمیان صلح ایک نجی تفریحی پروگرام کے سیٹ پر ہوئی، جہاں ملاقات کے دوران خوشگوار ماحول دیکھنے میں آیا، ہنسی مذاق کے ساتھ جذباتی لمحات بھی سامنے آئے اور دونوں نے ایک دوسرے کو گلے لگا کر رنجشوں کا خاتمہ کر دیا۔اس موقع پر کرشنا ابھیشیک کی اہلیہ کشمیرا شاہ بھی موجود تھیں، جبکہ اس منظر کی ویڈیو سماجی رابطوں کی ویب سائٹس پر تیزی سے مقبول ہو رہی ہے جس میں تینوں کو خوشگوار موڈ میں دیکھا جا سکتا ہے۔سنیتا آہوجا نے بھی اس پیش رفت کی تصدیق کرتے ہوئے کہا کہ طویل عرصے بعد دلوں کی دوریاں ختم ہوئیں، اب وہ کسی سے ناراض نہیں رہنا چاہتیں بلکہ سب کے لیے نیک تمناؤں کا اظہار کرتی ہیں۔انہوں نے کہا کہ اپنے ہی لوگوں سے کب تک ناراضی رکھی جا سکتی ہے، جب سب اپنی زندگی میں خوش ہیں تو دلوں میں کدورت رکھنے کا کوئی جواز نہیں۔واضح رہے کہ ایک مزاحیہ پروگرام میں ہونے والا معمولی تنازع وقت کے ساتھ بڑھ کر خاندانی اختلاف میں بدل گیا تھا جو طویل عرصے تک موضوع بحث بنا رہا۔
