لاہور ( سپورٹس ڈیسک)فیفا فٹبال ورلڈکپ 2026 کے پہلے کوارٹر فائنل میں فرانس نے مراکش کو 0-2 سے شکست دے کر سیمی فائنل میں جگہ بنا لی۔کپتان کیلیان ایمباپے اور عثمان ڈیمبیلے کی شاندار کارکردگی کی بدولت فرانس نے مراکش کو ہرا کر ورلڈکپ 2026 کے سیمی فائنل میں پہنچنے والی پہلی ٹیم کا اعزاز حاصل کر لیا۔میچ کے آغاز سے ہی فرانسیسی ٹیم کا پلڑا بھاری رہا۔ پہلے ہاف میں فرانس نے متعدد حملے کیے تاہم دونوں ٹیموں کے درمیان مقابلہ بغیر کسی گول کے برابر رہا۔بوسٹن اسٹیڈیم میں کھیلے گئے اس کوارٹر فائنل میں فرانس نے مراکش کے گول پر کئی خطرناک حملے کیے۔ ایمباپے کو ڈی کے اندر گرائے جانے پر فرانس کو پنالٹی ملی، تاہم ایمباپے کی شاٹ کو مراکشی گول کیپر نے آسانی سے روک لیا۔دوسرے ہاف میں بھی فرانس نے جارحانہ کھیل جاری رکھا اور بالآخر 60ویں منٹ میں کیلیان ایمباپے نے گول کرکے ٹیم کو برتری دلا دی۔ اس کے بعد 66ویں منٹ میں عثمان ڈیمبیلے نے شاندار گول کرکے فرانس کی برتری دوگنی کر دی۔82ویں منٹ میں مراکش کو فری کک ملی جسے فرانسیسی گول کیپر نے بہترین انداز میں ناکام بنایا، جبکہ مراکش کو گول کرنے کا ایک اور موقع بھی ملا لیکن وہ فائدہ نہ اٹھا سکا۔یوں فرانس نے 0-2 سے کامیابی حاصل کرتے ہوئے مسلسل تیسری مرتبہ فیفا ورلڈکپ کے سیمی فائنل میں جگہ بنا لی۔
