دبئی( سپورٹس ڈیسک)انٹرنیشنل کرکٹ کونسل (آئی سی سی) نے ون ڈے ورلڈکپ کے موجودہ فارمیٹ میں تبدیلیوں پر غور شروع کردیا ہے۔برطانوی نشریاتی ادارے کی رپورٹ کے مطابق ون ڈے ورلڈکپ میں شریک ٹیموں کی تعداد 14 سے کم کرکے 12 کرنے کی تجویز زیرِ غور ہے، جبکہ 2027 کے ورلڈکپ میں ’سپر سیون‘ مرحلہ متعارف کرانے کا امکان بھی ظاہر کیا جا رہا ہے۔رپورٹ میں کہا گیا ہے کہ ٹورنامنٹ کے نئے فارمیٹ سے پاک بھارت روایتی مقابلوں کی تعداد میں مزید اضافہ ہوسکتا ہے۔اسی طرح ورلڈ ٹیسٹ چیمپئن شپ کو مزید دلچسپ اور مسابقتی بنانے کے لیے سیمی فائنل مرحلہ شامل کرنے کی تجویز بھی سامنے آئی ہے۔ مڈل رینکنگ والی ٹیموں میں ٹیسٹ کرکٹ کا جذبہ بڑھانے کے لیے اس فارمولے پر غور کیا جا رہا ہے۔آئی سی سی ٹی ٹوئنٹی ورلڈکپ کے ’سپر ایٹ‘ مرحلے کو ’سپر ٹین‘ میں تبدیل کرنے کے امکانات کا بھی جائزہ لے رہی ہے۔ اس کے علاوہ فٹبال کی طرز پر کرکٹ میں ورلڈ کلب ٹی ٹوئنٹی ٹورنامنٹ کے انعقاد کی تیاریاں بھی تیز کردی گئی ہیں۔دوسری جانب مستقبل میں روایتی باہمی سیریز کے بجائے چار ملکی مختصر ٹورنامنٹس کے انعقاد کا امکان بھی ظاہر کیا جا رہا ہے۔
