احمد آباد ( سپورٹس ڈیسک) آئی سی سی بورڈ اجلاس میں ٹیسٹ کرکٹ میں خراب روشنی کے باعث ضائع ہونے والے کھیل کے وقت کو کم کرنے کے لیے ایک اہم آزمائشی اقدام کی منظوری دے دی گئی ہے۔نئے فیصلے کے مطابق ایسے ٹیسٹ میچز جہاں خراب روشنی کے باعث کھیل متاثر ہونے کا خدشہ ہو، وہاں میچ شروع ہونے سے قبل دونوں ٹیموں کی رضامندی سے سرخ گیند کے بجائے گلابی گیند استعمال کی جا سکے گی۔گلابی گیند اب تک صرف ڈے اینڈ نائٹ ٹیسٹ میچز میں استعمال کی جاتی رہی ہے، تاہم اس نئے اقدام کا مقصد فلڈ لائٹس میں کھیل کو جاری رکھنا اور خراب روشنی کے باعث ضائع ہونے والے اوورز میں کمی لانا ہے۔آئی سی سی نے ون ڈے اور ٹی ٹوئنٹی انٹرنیشنل کرکٹ میں بھی کچھ اہم تبدیلیوں کی منظوری دی ہے، جن کے تحت ہیڈ کوچز یا نامزد معاون عملے کو ڈرنکس بریک کے دوران میدان میں جا کر کھلاڑیوں سے مشاورت کی اجازت دی جائے گی۔مزید برآں ٹی ٹوئنٹی انٹرنیشنل میں اننگز کے درمیان وقفہ پندرہ منٹ مقرر کر دیا گیا ہے، جبکہ لیگ سائیڈ وائیڈ گیندوں کے فیصلوں کے لیے گائیڈ لائنز کو مستقل قانون کا حصہ بنا دیا گیا ہے۔اسی طرح مشکوک بولنگ ایکشن کی جانچ کے لیے امپائرز کو ہاک آئی ڈیٹا تک رسائی فراہم کرنے کا بھی فیصلہ کیا گیا ہے، جس سے فیصلوں میں مزید شفافیت آنے کی توقع ظاہر کی جا رہی ہے۔
