ایران کی آئی اے ای اے معائنہ کاروں کو جوہری تنصیبات میں دعوت کی خبروں کی تردید

 تہران( مانیٹرنگ ڈیسک)ایرانی وزارت خارجہ کے ترجمان اسماعیل بقائی نے ان خبروں کی سختی سے تردید کی ہے جن میں کہا گیا تھا کہ ایران نے بین الاقوامی جوہری توانائی ایجنسی کے معائنہ کاروں کو اپنی جوہری تنصیبات کے معائنے کی دعوت دی ہے۔ایرانی خبر رساں ادارے ارنا کے مطابق ترجمان نے صحافیوں سے گفتگو کرتے ہوئے واضح کیا کہ بعض ذرائع ابلاغ میں شائع ہونے والی یہ رپورٹس بے بنیاد ہیں۔انہوں نے کہا کہ ایران اور امریکہ کے درمیان مفاہمتی یادداشت کی شقوں کے مطابق جوہری معاملے پر مذاکرات مخصوص مدت اور شرائط کے تحت ہوں گے، جن میں پہلے سے طے شدہ تقاضوں کی تکمیل ضروری ہے۔اسماعیل بقائی کے مطابق 60 روزہ مدت کے دوران ایران کے جوہری پروگرام کی موجودہ صورتحال برقرار رکھی جائے گی، جبکہ بعض جوہری مراکز میں معمول کے معائنے جاری رہیں گے۔تاہم انہوں نے واضح کیا کہ وہ تنصیبات جہاں سابقہ حملوں کے باعث بین الاقوامی معائنہ کاروں کی رسائی معطل کی گئی تھی، ان کے معائنے آئندہ مذاکرات اور ان کے نتائج سے مشروط ہوں گے۔ایرانی ترجمان نے زور دیا کہ اس معاملے سے متعلق تمام آئندہ پیش رفت جاری مذاکرات اور ان کے حتمی نتائج کے مطابق طے کی جائے گی۔